विश्व बस्नेतको अभिनय रहेको दोस्रो रैगिन फिल्म ‘सिन्दुर’को प्रथम प्रदर्शन । काठमाडौंका हलमा सयुंक्त रुपमा सिन्दुर ५२ हप्ता चलेको पहिलो सिल्भर जुब्ली फिल्मको निर्देशन प्रकाश थापाले गरेका थिए । यही फिल्मबाट गोपालराज मैनाली र बसुन्धरा भुसाल चंखे र नक्कली नामले परिचित भएका थिए भने नीर शाह पहिलो पटक खलनायकको भूमिकामा देखिएका थिए । यो फिल्मले उज्बेकिस्तानको फिल्म फेस्टिभलमा नेपालको प्रतिनिधित्व गरेको थियो । यसलाई नेपालमै डबिङ गरेको पहिलो फिल्म पनि मानिन्छ । उदितनारायण झाले पाश्र्व गायनमा मौका पाएको पहिलो फिल्म पनि यसैलाई मानिन्छ । उनले हे नक्कली बोलको गीत गाएका थिए । नृत्य निर्देशक बसन्त श्रेष्ठले पनि नृत्य निर्देशन यही फिल्मबाट सुरु गरेका थिए । यो फिल्म अशोक हल पाटन, नवदुर्गा भक्तपुर, जय नेपाल काठमाडौँ, विश्वज्योति काठमाडौँ र रञ्जनमा चलेको थियो ।